«Перашкод няма»: як прафесiйны iнструктар прапанаваў iнвалiдам-калясачнiкам заняцца актыўнымi вiдамi воднага спорту
- Подписаться на
Напрыканцы жніўня і ў пачатку верасня «Асобы падыход» правядзе яшчэ дзве трэніроўкі.Уявіце, што людзі з траўмамі пазваночніка катаюцца на гідрацыклах, на цюбінгах цi водных лыжах. Насамрэч у многіх краінах свету гэта ўжо даўно норма. У клубах для аматараў водных экстрэмальных відаў спорту займаюцца людзі, якія маюць інваліднасць, і цалкам здаровыя — разам, бо клубы інклюзіўныя. Гэтую ідэю ўкараніць у нас захацеў Дзяніс Васілевіч, прафесійны трэнер па вяслярных відах спорту, а таксама інструктар па актыўнай рэабілітацыі:
— Я працую з людзьмі з інваліднасцю даўно, і не проста працую: у мяне мама з інваліднасцю. У 2012 годзе пачаў займацца актыўнай рэабілітацыяй людзей з траўмай спіннога мозгу — мяне запрасіла Рэспубліканская асацыяцыя інвалідаў-калясачнікаў паспрабаваць сябе ў якасці інструктара па агульнай фізічнай падрыхтоўцы і плаванні. Адтуль усё і пачалося. Разумеў і бачыў, што няма асаблівых перашкод у такіх людзей. У нашых сілах адаптаваць тое, што можам, каб ім было прасцей.
Стажыроўкі, камандзіроўкі, паездкі ў еўрапейскія краіны і ЗША — паціху Дзяніс набраўся вопыту. Да таго ж вада заўсёды была блізкая яму — значыць, трэба было працаваць у гэтым кірунку. Яшчэ адна нагода падмацавала ідэю: чалавек у адкрытай прасторы адчувае сябе незалежным. Калі ён увесь час прыкаваны да інваліднай каляскі, то такія рэчы, як плаванне ў басейне, у адкрытым вадаёме, у цэлым знаходжанне каля вады без каляскі, даюць пачуццё незалежнасці, і чалавек не думае аб сваёй інваліднасці.
На конкурсе праект «Асаблівы падыход» стаў фіналістам і атрымаў фінансавую дапамогу ад мецэнатаў Social Weekend. На атрыманыя сродкі купілi абсталяванне, прыстасаванні, некаторыя з іх рабілі на заказ, нешта майстравалі і самі. І вось упершыню выпрабавалі адаптаваныя віды воднага спорту ля Нароўлі на злёце «Палескія зоры».
— Водныя лыжы — складаная штука, таму для пачатку мы вырашылі пракаціцца на цюбінгу, які будзе цягнуць гідраскутар. Колькі было эмоцый! З яго не хацелі злазіць. Пачуццё хуткасці, свабоды, нават я сам не чакаў такой рэакцыі, — Дзяніс Васілевіч натхнёны, бо падчас першага маштабнага апрабавання ён убачыў, што яго праект будзе жыць і развівацца. Больш за тое, яму ўжо патэлефанавалі з мінскай фірмы, якая займаецца пракатам сапбордаў. Яны не ведалі, што ўвогуле можна катацца і людзям з абмежаванымі магчымасцямі.
Спорт, кажа Дзяніс, толькі зачэпка. «Асаблівы падыход» — гэта, хутчэй, праект пра тое, што няма абмежаванняў:
Аб тым, што такія забавы неабходныя, гаворыць і Таццяна Дубадзел, у якой пералом паяснічнага аддзела пазваночніка:
— Мне вельмі спадабалася катацца на цюбінгу! Хлопцы адказна падышлі да праекта: бяспека выканана, на мяне надзелі выратавальную камізэльку, усё расказалі, разам сеў на «ватрушку» валанцёр, які страхаваў. У мае задачы ўваходзіла ўзяцца за ручкі, і калі крануўся гідраскутар, валанцёр расказваў, як трымаць раўнавагу, куды нахі-ляцца. Гэта было неверагодна!
Так, а што далей? Дзяніс Ва-сілевіч гаворыць, акрамя таго абсталявання, якое ўжо ёсць, каманда «Асаблівага падыходу» дакупіць байдаркі, каяк, вейкборд і ўкараніць дайвінг на адкрытых водах — усё адаптаванае. Дарэчы, ёсць задума, што арганізаваць зімой. Але пакуль у канцы жніўня — пачатку верасня яшчэ два разы каманда праекта арганізуе летнія водныя забавы са сваімі прыладамі. Ужо некалькі груп з Ліды і Мінска сказалі, што чакаюць з нецярпеннем новых летніх адчуванняў.
